【本報訊】70歲的鮑文範，行內都叫他鮑sir。管理過大小戲院，由香港首間迷你戲院到小眾藝術影院，前港督影癡尤德都是座上客。入行52年，是行內老行尊，他的馬鞍山戲院近日爆紅，只因播了35天《十年》。人人說他勇，鮑sir卻不以為然：「香港幾時變到播套片，都要夠勇？」他掌舵的新華戲院曾上映禁片《天安門》。「有准映證就可以播，冇犯法點解要驚？」最需要恐懼的是恐懼本身，信焉。
記者：呂麗嬋
相約鮑sir到馬鞍山戲院拍照，他說周六才有空，皆因周一至五，他忙着看試片。「上年睇咗310套戲，偏偏冇睇《十年》，只因呢套片，根本冇諗過喺戲院上，所以冇邀請院商睇試片」。他是金像獎評審，這一票，他不諱言投了給《十年》。「都係明票，咁都贏，仲有乜好拗？」不為票房，不為投資額多少，大抵，都是投了給創作自由？「北上發展，唔好計導演編劇，幕後製作都要調節，心中有氣，投畀《十年》，有幾出奇？」鮑sir這樣說。
「幾時變到播片都要夠勇？」
「好多人話我勇，其實勇乜鬼，政府評咗級、發咗張准映證，就表示可以放映，做生意之嘛，我見藝術中心幾賣座，佢哋冇檔期，咁啱我有，就問嗰邊要片。香港幾時變到播套片，都要夠勇？」最初一日播兩場，後來見報了，日日全院滿座，就一日播6場。「暑假前排（上映的）戲一早滿晒，如果有啲排咗唔收得，要提早落畫，再播《十年》都唔出奇。香港始終唔同大陸，院商有自主權，可自由排片」。
獨家播禁片，鮑sir經驗老到。當年位於灣仔鷹君中心的新華戲院，放映《天安門》一樣引起滿城風雨。「日日都有兩班人喺戲院門口，一班抗議一班聲援。」入行半世紀，鮑Sir說在商言商，錯只錯在「連條底線都冇埋」：「有晒准映證，唔係犯法，做乜要驚？」他身兼香港戲院商會副會長，既是電影買手，也管理過大小不同戲院。「以前啲戲院，動輒上千座位，買片好大壓力，因為套片票房唔得，就蝕大本」。
生於小康之家，中學畢業原擬到美國升大學，可是爸爸患病，去不成，剛好美國哥倫比亞影片公司在港開分支，本身是影癡的他，誤打誤撞入行。「細個住尖沙嘴，好近麗宮戲院，已經成日去睇戲。」那個年代，播的多是美國主流大片，過檔安樂影片，跟隨創辦人江祖貽周遊列國影展買片，是香港首批引進歐洲片的發行商。「嗰個年代，唔好話去康城，坐飛機已係一件大事。」他笑說。
何止坐飛機，那些年，上戲院對於升斗市民來說也是大事。當年的碧麗宮、麗宮戲院富麗堂皇，但隨時代發展，戲院規模越來越細，也越搬越偏僻。位於東京街的京華戲院，是香港首間迷你戲院，正是由他一手催生。「嗰時消防法例規定戲院要單幢建築，因為大屏幕無樑柱，怕危險，我成日去英國，見到好多戲院好細間，建喺地庫都有。」英國可以，香港有何不可？由是，分3院每院400座位的京華戲院，於1982年落成。
97前獨家放映禁片《天安門》
找專家撰寫安全報告，與政府周旋，從此在港遍地開花。「80、90年代迷你戲院細極都有400、500座位，𠵱家細到百幾個位都有」。戲院座位數目越來越少，香港高地價成反比越來越高。此外，專播文藝冷門電影的新華戲院，也是他的得意之作。「個舖近灣仔碼頭，位置好偏，租平啲，我覺得只要戲好，隔涉啲都會嚟睇」。了解影癡戲迷的「朝聖」心態，再一次印證他眼光獨到。由他一手引入的經典電影如《星光伴我心》、《無悔今生》等，是一代人的集體記憶，也為他贏得7次金像獎最佳外語片，見證電影業百花齊放的時代。
「我最記得，新華85年開業，第一套播嘅，係活地阿倫嘅電影，嗰時，佢喺香港仲唔係咁多人識。」其時，票價劃一不設前後座，又設學生半價，沒多久，新華已成文青聚腳點，港督尤德也是座上客。「佢差唔多隔個星期就嚟戲院，同副官一齊4、5個人，好低調。」可惜戲院還是敵不過貴租，1997年7月1日，獨家播完爭議紀錄片《天安門》後結業，無法平穩過渡，但到底見證了一個時代的終結，應已無憾。
