推理題：三人進場睇戲，散場時只剩一點五人。點解點解點解？夠鐘，因為一個頭暈中場扯白旗返歸去，另一個作嘔得返半條人命。睇呢套「全球首部第一身視角電影」要做生還者講彩數，平日轉半個圈已暈佗佗的我竟然覺得好high，爽到似雙手齊幫自己打腎上腺素咁。
開首的單色慢鏡zoom in刀插頸、槍爆頭、影像型到裂，只係片頭我可以睇半個鐘。熱身後進入主角Henry第一身的殺戮戰場，節奏快到眨下眼已死咗個人。
電影源自俄羅斯樂隊Biting Elbows成員Ilya Naishuller製作、過億點擊率的第一身視角MV《Bad Motherf*cker》，觀者如同射擊game主角，親身參與度達1200%。之不過幾分鐘用第一視點就話得啫，變成電影會唔會癲咗少少？癲人Timur Bekmambetov，即係《殺神特工》（Wanted）的導演睇完MV就鼓勵Ilya Naishuller寫劇本拍戲，咁就殺咗我一點五個朋友！
特技人全程頭戴GoPro拍攝，好多位一shot落，好鬼癲。跳橋追逐開槍刀插炸車劫機從未如此有實感，超動態的動作鏡頭當然令人有暈眩感，但比起手搖鏡那種暈，實在痛快得多。
片中Henry的索女老婆被異能核突佬擄走，被城內一堆男人追殺，惟獨有個叫Jimmy的人成日以不同造型走出來幫自己。故事係點其實唔太影響投入程度，見到佢殺敵手法層出不窮，場景不停轉換，新鮮感不斷，好過癮。極度血腥萬分暴力，但主角沒殺過一個無辜的人，喂，呢樣好緊要o架！
不過近尾聲時場景的轉換與殺敵的手法有點重複，套路開始相似，睇頭頓變拋物線。如果電影可以縮短十分鐘，會更緊湊，觀眾神經可以扯得更行，頂唔順離場的人應該會少一點。
《爆機特攻》（Hardcore Henry）
主演：添羅夫、 希莉賓妮、沙杜高柏
導演：伊利亞納舒拿
級別：III
評分：88分
現已上映
記者：葉青霞