日本九州熊本喺今個月發生大地震，日本網球手錦織圭雖然身在外地，忙於參加比賽，不過亦都好擔心身處災區嘅同胞；佢喺日前就向熊本嘅避難中心捐贈1,000張床墊，希望當地災民可以好好休息。錦織圭仲話：「為咗令更多人重拾笑容，我亦會喺網球場上努力。」呢位日本一哥真係講得出做得到㗎，佢喺上周六巴塞隆拿公開賽男單四強，以盤數2:0擊敗法國柏利，順利躋身決賽。錦織圭之前同柏利兩次交手都輸波，今次終於贏返次梗係開心啦，佢仲話覺得自己今年狀態好咗，似乎想贏一個冠軍為災區嘅同胞打氣。（now636台今日11:30pm直播）