曼聯自從前領隊費格遜離任之後，慢慢已經失去咗英超領導地位，今時今日爭到前四，下季有得踢歐聯已經開心到癲。雖然紅魔嘅球壇地位今非昔比，不過使錢程度就依然冠絕英超。日前《周日時報》公佈嘅財富榜，曼聯前鋒朗尼係英國最有錢嘅年輕運動員，叠水過梅禮同麥艾萊。
朗尼今季成日傷，唔多使落場踢波，但身家就冇縮到水，據《周日時報》披露佢𠵱家坐擁8,200萬鎊（約9.2億港元）財富，係英國30歲或以下嘅運動員裏面最有錢一位，比之前一年多左1,000萬鎊。至於第二同第三位分別係網球手梅禮同高球界嘅麥艾萊，身家分別有5,800萬鎊（約6.5億港元）同5,600萬鎊（約6.3億港元）。
朗尼喺曼聯周薪成30萬鎊（約335萬港元），係英超最高薪球員，要養佢確係好大負擔。除此之外，紅魔喺畀經理人佣金嘅支出都一樣咁誇。喺上年夏天轉會窗，20支英超球會喺買賣球員運作，畀球員經理人嘅佣金，總數高達4,680萬鎊（約5.2億港元），而單係曼聯就佔咗最高嘅1,000萬鎊。