【飲食籽：搵食地圖】
良景邨於1988年開始入伙，當時大部份住戶都是育有子女的年輕家庭，因為生活拮据，有些主婦開始推着手推車，在小學附近兜售零食來幫補家計。由於生意不錯，陸續有人加入，賣起雪糕、班戟及壽司等食物，農曆新年期間更有魚蛋、臭豆腐和雞蛋仔等，雖然售價不低卻大受歡迎，它們正是如今車仔檔的雛形。後來有檔主覺得有利可圖，開始在平日擺賣，為逃過小販管理隊，從日間轉到夜晚，漸漸形成一股風潮，甚至有九龍的居民特地來這裏開檔。
車仔檔維持了十多年，客人除了良景邨居民，鄰近數條邨的居民亦會過來覓食，直至今年農曆新年期間，夜市小販與「管理員」發生衝突，法庭遂於上月頒佈禁制令，車仔檔從此絕迹。同一時間，良景街市翻新完畢，易名為良景市集，裏面約有10檔熟食店專攻消夜時段，其中兩檔正是昔日最受歡迎的車仔檔。
鐵板爆炒蒜香吸客
先說這間蒜爆王，最大特色自是下大量蒜茸在鐵板上爆炒牛肉、魷魚和雞軟骨等小吃，雖然近年才加入良景車仔檔行列，但卻風評甚佳，幾乎每次開檔都會出現人龍。農曆新年的衝突過後，車仔檔集體消失了一陣子，然後忽隱忽現，就是不見蒜爆王的蹤影，原來兩個月前小店搬進了良景市集。蒜爆王老闆賀先生表示，衝突後本已決定不再經營，豈料不斷收到熟客傳來的訊息，說很想再吃到他的食物，心頭湧起一份激動，遂以街市開店重生，「我都係靠車仔檔起家，我覺得車仔檔係本地文化，應該諗吓點樣去保留同管理，而唔係消除。可惜上個月高等法院已經頒佈禁制令，開車仔檔唔只會俾人封車罰錢，仲會涉及刑事，相信以後好難再見到良景車仔檔啦。」
重開後的蒜爆王多了炒粉麵，也設置了幾個座位，可看着大廚即席烹調，像吃鐵板料理。不少客人也愛堂食，順便跟老闆聊聊天。「入舖之後，我希望保持一切不變，寧願賺少一啲，都要將價錢同質素維持喺車仔檔嘅時期，回應客人嘅熱情。」
蒜爆王
良景邨良景市集
日式串燒以質取勝
外賣串燒並不新奇，新奇的是日式串燒。單看餐單上的價錢，燒牛柳粒賣$20、燒鴨舌也要$18，價錢不怎「街坊」。「咁要睇你同乜嘢比，我嘅用料同份量比得起日本餐廳，呢啲食物係餐廳食至少貴一半，份量仲要少啲。」赤葉本目老闆許生接着說：「就算賣得比人哋平，外賣日式食物本身都好冒險，咁啱知道呢度招租，又知道有大批鍾意食消夜嘅居民，就諗住不妨一試。」開業初期，他以「試過唔好食就原銀奉還」作招徠，果然成功吸引客人，很多吃過後會再度光顧。
小店下午主打飯類，像鰻魚飯及鯖魚飯，由於即叫即做，熱呼呼的飯誘發食慾；晚上則是串燒為多，雞泡魚乾、牛板翼及帆立貝都很受歡迎。「食串燒嘅人大多數係年輕人，佢哋都好識食，亦好捨得使錢去食，只係睇你嘅食物可唔可以吸引到佢哋。」
赤葉本目
良景邨良景市集
紅橋：甜品集中地
紅橋（又稱虹橋）本來交通不太方便，附近盡是開滿補習社的商場，又沒有街市，生活配套欠佳。可幸鄰近大排檔集中地，近年吸引越來越多食肆在附近開業，連帶紅橋也興旺起來，尤其是甜品店，糖水、窩夫、手工甜品、特色飲料，應有盡有，要在當中脫穎而出可
睇得又食得 快手唧貓配窩夫
甫進店內，看見甜品師傅黃先生正以朱古力醬在碟上畫卡通貓。「練習緊新甜品？」記者好奇地問。「唔係，只係舖頭以貓同窩夫做主題，當收到窩夫嘅單，我就會在碟邊畫朱古力貓做裝飾。」黃先生答道。小店嘆甜品主打窩夫，共有十多種款式，紫薯窩夫、抹茶麻糬紅豆鮮忌廉窩夫，單看名字已有一定吸引力。像紫薯窩夫，使用自製的紫薯忌廉，把紫薯蓉及忌廉以六四比混合，上面還綴有鮮紫薯肉和紫薯乾，把紫薯以三種方式融入窩夫之中，做法遠比名字來得有深度。
而抹茶麻糬紅豆鮮忌廉窩夫，是店中唯一會在窩夫漿混入味道的甜品。他試過把宇治抹茶粉混進忌廉及做成醬汁，最後還是直接加進粉漿，讓味道更突出。除了宇治抹茶粉，粉漿內還有麻糬粒，吃起來煙煙韌韌，配搭紅豆茸和鮮忌廉吃，感覺十分豐富。每天賣出這麼多窩夫，豈非畫到手軟。「畫一隻貓只係要兩至三分鐘，簡化一啲，一分鐘就可以搞掂，或者因為家中有養貓狗嘅關係，腦海總係可以即時浮現起佢哋嘅神情動作。」黃先生笑說。
嘆甜品
井財街15號金銘大廈地下4號
一半果肉一半忌廉 手工雪糕賣足料
「噱頭唔係永恒，好食先係永恒。」全心全意的老闆陳先生說得好不客氣。原本這店對面另有一間甜品店，雙方生意都不錯，分別是對方不斷拋出新噱頭，他則反覆鑽研現有甜品。對方甚至曾找少女在門口招客，效果非常顯著，弄得他也得跟着做。後來有熟客告訴他，在對面吃到變酸的甜品，頓時當頭棒喝，若言甜品也做不好，還談甚麼噱頭？於是他把整副精神時間花在招牌雪糕上，「唔係每種材料都適合做雪糕，例如芋頭太粉，質感似雪條；荔枝水份太多，會令味道變淡。大部份坊間食到嘅雪糕都要靠香精嚟增味，再加啲果乾令人感覺用咗好多果肉，但食起嚟味道好淡。」原來重點是鮮果肉的份量，他們以一半果肉一半忌廉的配方製作雪糕，沒加鮮奶，味道濃得像在吃水果本身，「人哋用D24榴槤做雪糕，一係要落少啲降低成本，一係要賣到七、八十蚊，我用普通榴槤落足料就夠贏，做街坊生意，抵食又好味先係留住客人嘅最佳手段。」
全心全意
青菱徑6號富麗大廈D1地下
記者：蘇健進
攝影：劉永發
編輯：陳國棟
美術：黃創泰