【專題籽：胚芽故事】
自由定價聽落好筍，但過程並唔係一手交錢、一手交貨咁簡單。部份貨品自由定價嘅「德昌閣仔」，負責人麒麟球就要你諗清楚原材料要幾錢，設計師嘅技藝、經驗要幾錢，租金最少佔幾多，店主又要賺幾多？隨時度到頭都爆。紮染二人組「巨人染」嘅展覽作品同樣自由定價，但要你先執筆寫字，寫低對紮染作品嘅觀後感，睇埋出價再考慮係咪賣給你。賣嘢賣到嫁女咁，都係想為貨品搵到個好歸宿。
德昌閣仔店主：人類明明唔係理性消費
「自由定價賣手作、藝術品，的確冇乜得賺。」麒麟球講到明：「但閣仔唔係一盤生意，佢係我理想中嘅生活空間，就好似有人鍾意跑車一樣。我好想有個自由空間，好似祠堂咁集中到一班人，可以不斷畀新鮮感我，咁樣當然有成本。」
多個月前，麒麟球在油麻地開設了德昌閣仔，位置頗為隔涉，隱身在某幢舊樓，門口貼了張「活在當下」的揮春。店內擺放了五六位手作人的作品，還有十多本書及二手衣服等，全部自由定價。他指很多人都會拿着工藝品，眉頭緊皺思前想後如何定價，「不過對食物大家就好快手，可能大家有行超級市場，都知價。」他把自由定價稱之為理性購買練習，「經濟學假設消費者都係理性，但人類明明唔係理性消費，例如有人買衫根本為興趣。我期望顧客自行定價嗰陣，可以諗清楚貨品嘅真正成本，例如製作時間、手藝價值，諗通諗透，會更加珍惜。」如果有人出價太低會點？「部份貨品有寫到成本價，如果佢覺得『咦……都唔值。』我會話如果唔太欣賞，就唔好買返屋企嘥位，始終香港地方細。但個客人好欣賞嘅話，就當補貼佢囉。」
飯錢都可隨心出 出租場地作補貼
他曾開設製作公司，自言拍廣告拍到麻木，兩傘運動之後想在生活上做些改變，賣了房子，在油麻地開了兩間舖，朋友覺得他癲咗，但他自得其樂，除了德昌閣仔，麒麟球還在德昌里3號搞了一個fine dining小餐廳「德昌里三號」，同樣自由定價，每晚一轉，希望大家慢慢食慢慢傾。偶爾還會讓人辦烘焗班或借場烹飪，幫補租金。德昌閣仔就不時有放映會、mini concert及手作班等，「喺閣仔可以免費學手作，免費聽唱作人玩live，參加者仲會隨意畀錢當入場費，我仲有錢賺。」 好像真係幾抵喎。
德昌閣仔
油麻地德昌里13號閣樓
德昌里三號
油麻地德昌里3號
巨人染 寫低感想睇誠意
巨人染由香港人蕭芷澄（Siu）及台灣人張智晞（Josh）於一年前成立，早前這對情侶檔舉辦紮染展覽，不欲大家睇完就算，決定把展覽作品全以自由定價方式放售。為免變成拍賣般價高者得，兩人以不記名形式，讓買家在紙仔寫下價錢、觀後感及購買原因，透過文字尋找合適主人。看展覽買展品還要寫感想，應該都萬中無一。Siu解釋：「好想了解展品對大家嚟講價值有幾高、有乜感受，亦希望同觀眾有進一步嘅互動。而唔係單向咁觀賞加消費。」手作的價值確實很難估量，所以作品旁邊有提示製作時間及意念，「有啲人雖然定價不高，但購買原因感動到我哋，最後都願意賣畀佢。」
古老技藝 至少13道工序
二人短居香港兩個月，在沙頭角埋頭紮染籌備展覽。雖然今次展覽算是不計成本，但工藝始終有價，「有塊紮染咗八、九個鐘嘅布料，有人出價$150，計計數連最低工資都冇。」大概香港人甚少接觸紮染技術，不知人手染布過程可以很繁複，這種有過千年歷史的古老技藝，基本有13道工序，兩人指着身上的衣物解說：「簡單紮染衣服只要一個鐘，但要完成複雜嘅顏色，起碼要做八、九個鐘。」用作品“Fall into the color zone”為例，Josh從半年前開始構思並試驗，前後失敗12次才掌握竅門，眼前的完成品是第13胎，連續又紮又染做了10小時。記者隨口說有人出100萬賣不賣，他凝視心血結晶認真考慮10秒，緩緩地道：「都唔一定賣，價值高低係見仁見智。」
facebook：巨人染Giants Tie Dye
其他同類小店
影意志影院
睇戲都可以自由定價？當然唔係連鎖戲院，你覺得《蝙蝠俠對超人》難睇，完場後只畀五蚊洩憤，出品商十成會破產。說的是灣仔富德樓的影意志影院，他們會不定期舉辦放映會，早前的「有種電影節」、「香港獨立電影節」及部份社區放映，都以自由定價模式收費。負責人崔允信說：「希望等大家感受到睇電影未必係行街、食飯、買嘢之類嘅消費，票價可以係內心對製作團隊嘅支持。另外亦係噱頭之一，可以吸引觀眾入場。」根據過往經驗，有一小部份的觀眾會較慷慨，拉上補下，多數收到平均數十元的票價。
灣仔軒尼詩道365-367號富德樓4樓
Artist Fee
由藝術工作者Sin打理，收集了很多二手物品，門口的是自由定價貨品，大家自行取貨，然後在信箱自由入錢即可，講個信字。不過Sin在fb指很多人錯入到其他信箱，而且有時只收到幾蚊……
灣仔軒尼詩道365-367號富德樓11樓
桂林日市
美孚家政、青年重奪未來及小麗老師等團體在深水埗桂林街舉辦桂林日市，促請政府正視小販和墟市的價值。市集為免觸犯法例，熟食檔只派發魚蛋、豆腐花、滷味等熟食，由市民自由放下金錢，過程不涉買賣。
記者：臧 諾
攝影：伍慶泉、劉永發
編輯：陳國棟
美術：利英豪