福建噚晚喺修頓嘅甲一前四爭奪戰中，憑出色嘅防守，成功守死南青主力蔡再懃，以69:64贏波，聯賽兩戰全勝。
一直靠蔡再懃得分嘅南青，開局已受制於福建嘅全場緊迫戰術，令到之前每場平均得超過20分嘅阿懃，喺第一節只攞到兩分。半場以27:40落後嘅南青，一班年輕球員喺尾段反撲，比賽仲有唔夠一分鐘，憑何倚富連入兩個三分波追近至61:63，可惜阿懃喺壓力下連續射失兩個關鍵罰球，間接令球隊輸波。賽後福建教練安慶健話：「為咗呢場波，已經部署咗幾個禮拜，成功將阿懃嘅得分壓喺20分以下（最終得18分）。」安教練仲話有段時間打得比較心急，加上用人唔多，搞到尾段有今場得16分同19籃板嘅司徒偉傑抽筋㖭。至於頭場南華就輕鬆以106:71大炒晉龍。