工黨噚晚喺西港城大舞台搞咗36圍「撐住香港」2016籌款晚宴，咁叫得籌款晚宴，就梗係要有啲噱頭嘢酬賓，而工黨上下就精英盡出扮鬼扮馬，仲請到A貨Donald Trump娛賓。
晚宴有好多泛民同社運友好畀面出席，包括「香港眾志」副主席黎汶洛、佔中發起人陳健民、公民黨議員楊岳橋等，不過一眾政府官員就唔見影，建制派有立法會主席曾鈺成撐場，自由黨田少就捐咗四萬元但冇現身。
咁工黨又有乜節目娛賓？先有任職航空業樂隊表演，惡搞梁振英「行李事件」，贏得台下唔少掌聲。
不滿梁特 建制 令香港不舉
有歌聽，仲有李卓人戴上假髮扮Donald Trump惡搞。呢個A貨唔選美國總統，反而用「香港再舉」口號選特首，話梁振英同建制派令香港「不舉」，選佢香港才會「硬起來」，政綱包括拉晒職工盟成員坐監，由中共畀錢喺中港之間起幅牆，又話自己會坐私人飛機，所以唔使保安人員幫手送行李。
漫畫家尊子送出「團結就是力量」藝術品畀工黨，賣到8,500元，而尊子新鮮出爐、諷刺《明報》無理解僱姜國元嗰幅「堅持新聞自由，一點也不後退」畫作，就籌到7,500元。工黨又拍賣李卓人「六人餐」服務，最終由「蘭桂坊之父」盛智文用五萬元投得。晚宴最終籌得80萬元。
李八方
mailto:[email protected]