楊先生：小鳳姐呀，乜嘢叫「每一吋汗水，換每一個『盛州』（《順流逆流》歌詞）」呀？
小鳳姐（堅認真）：盛州……成就吖嘛，係咪我唱錯音？呢個其實唔關我事，係因為押韻，歌詞同旋律如果有少少拗撬，係好似聽落唔啱音。其實我係啱音㗎，如果你唱呢，可能會變成好唔啱音。
黃小姐：小鳳姐你個嘟嘟嘴好經典，請問有乜作用？
小鳳姐：我唔覺喎，完全唔知自己唱歌係點，因為我係對住觀眾唱，唔會對住塊鏡去唱，所以絕對唔係刻意做呢個動作，係一個自然方式，我唔知自己嘟㗎，我唔係嘟嘟（鄭裕玲），哈哈哈！（全場爆笑）
王先生：𠵱家咁多後生仔都成日「請小鳳姐出嚟」，你平時有冇同年輕人傾吓偈？
小鳳姐：其實我初初好好奇，究竟係好呢定唔好呢？可唔可以答番我？至於同年輕人傾偈，好多好多，同佢哋傾完偈好有收穫，明白佢哋諗乜，當然我哋都經歷過呢個階段，佢哋比我哋心急好多，以同一個年齡層，當年我哋唔諗咁多嘢，最緊要對自己有信心，搵到目標就堅持行落去，否則付出努力會白費，千祈唔好浪費時間。
趙先生：最鍾意食乜嘢包？蓮蓉包？叉燒包？定乜嘢包呀？
小鳳姐：我鍾意食西式叉燒包，即係叉燒餐包，同埋菠蘿包。
容小姐：過去好多藝人模仿你，其實你介唔介意？
小鳳姐：其實我初初少少介意，後來呢我又覺得好開心喎，𠵱家變咗完全唔介意嘞。
蕭先生：你覺得邊個扮你最似?
小鳳姐：有分別嘅，有啲形象扮，有啲歌聲扮，我覺得形象扮戚美珍好似，好靚㗎，歌聲唔使講啦，阿梅（梅艷芳）啦！
