NBA火箭後衞夏登（James Harden）經常以眼神防守而成為球迷笑柄，佢喺周四季後賽關鍵第三場終於都做齣好戲，最後2.7秒射入中距離，幫球隊97:96擊敗勇士，總場數追成1:2。
勇士後衞史堤芬居里（Stephen Curry）連續第二場缺陣，浪花兄弟另一人K湯遜（Klay Thompson）表現就麻麻，全場只入17分，三分波七射全炒。雖然勇士大部份時間落後，I卡拉克（Ian Clark）今仗就成為奇兵，最後10秒上籃幫球隊反超前96:95。不過貴為火箭嘅基石，夏登點都要做吓嘢，最後2.7秒冷靜射入中距離，幫火箭奠勝，加上勇士前鋒祖蒙特格連（Draymond Green）甩手撞出界，錯失最後一擊機會，火箭險勝一分，總算場數追成1:2。
火箭險勝後，教練碧卡史達夫（J.B.Bickerstaff）就講：「夏登呢球絕殺就係佢嘅典範，佢成日都做到呢啲驚喜。」不過火箭都唔好開心住，據ESPN嘅BPI指數，火箭出局機率仍然係97%，居里下場應該復出，睇怕都唔會連敗。
同日其餘兩場季後賽第三戰就係客隊發威，西岸首圈雷霆憑杜蘭特（Kevin Durant）轟入34分，作客131:102大炒小馬，場數領先2:1。速龍亦作客101:85輕取溜馬，東岸首圈亦領先2:1。
