一票難求嘅電影《十年》已經登陸咗兩大手機平台，大家又睇咗未呢？前政務司司長陳方安生日前成功班到兩張飛，同女女一齊入場睇。陳太睇完大有感觸，兼推薦大家去睇，因為套戲帶出唔少值得反思嘅問題，大家不妨一齊諗吓。
陳太當然唔想電影內容成真啦，不過佢覺得套戲警惕咗大家，香港嘅法治、人權、言論自由同埋慣常嘅生活方式唔係必然。陳太仲話，大家都應該睇吓《十年》，然後諗吓係咪仲要對社會上不公不義嘅事坐視不理，定係要為維護民主、人權、自由發聲，以和平理性方式爭取。八方相信，呢個亦正正係〈本地蛋〉故事想講千祈唔好慣嘅訊息。