向來主持會議方式惹火嘅財委會主席陳健波，早排因審議爭議性撥款時不作申報，被人民力量陳偉業鬧爆後，噚日主持財委會，處理一個佢聲稱冇任何直接或間接利益嘅撥款申請時，就突然話為釋除大家疑慮，申報自己為慕尼克再保險顧問。
大嚿聽到即被辣着，席上狂轟陳健波，話冇利益都申報，係咪知自己身有屎？突然醒覺自己之前做錯咗？明明冇嘢要申報都申報？
陳健波解釋，以前唔明點解係又申報唔係又申報，但𠵱家明白咁係安全做法，以免浪費大家時間喎。大嚿更㷫，鬧陳健波明明有利益就唔申報，𠵱家冇利益就扮嘢申報。難得有「衝擊波」之稱嘅陳健波冇鬧番大嚿轉頭，財委會就繼續開會。