時裝品牌Dior Homme昨晚在將軍澳邵氏影城舉行時裝騷，現場星光熠熠，包括楊千嬅、何超瓊、日本藝人赤西仁、甘國亮、林德信、竇驍，同近日與柯震東夜蒲攬攬的何超蓮亦有到場。
超蓮甫現身即問佢係咪拍拖？佢話:「唔係，我單身。」咁同柯震東呢？影埋你俾佢手勢純熟咁箍頸攬實喎，超蓮謂:「只係挨埋去啫，冇攬實。搞到媽咪都誤會我，仲訓話，我下次會檢點啲。」
啲人話你收好多兵喎……女神梗係收兵0架啦，但超蓮謙稱:「唔係兵，係朋友。」柯震東追你？「唔覺，我去台灣玩，佢盡地主之誼。佢好好人，我都唔好意思累到佢。」
再問超蓮可介意男方曾涉毒走歧途？超蓮稱:「我認識佢嘅時候，嗰啲事都已經成為過去。每個人都有過去，都會改過。佢人品好好，作為朋友，真係好好。」
咁係咪好似報道咁講，超蓮因為柯震東同李毓芬分手，才陪他買醉開解？超蓮就話柯震東無提分手一事，兩人平時見面都唔會無啦啦講感情事。」急澄清與柯震東只係朋友，可是因為擔心嚇走其他追求者？超蓮沒好氣地謂:「我唔係好似你哋所講嘅咁多追求者，只係普通朋友，搞到好尷尬，所以要澄清。」
之後問起舊愛吳克羣最近幫柯震東舊愛李毓芬寫咗首歌，日前仲喺自己fb wall，留下了這首《是我不夠好》的YouTube link，並留下意味深長的一句:「做人～對得起良心就好⋯⋯」似有弦外之音，她稱:「我都講咗好多次0架喇，我同佢之間都已經係過咗去，可能人哋真係要宣傳首歌呢。我都唔想聯想咁多喇。我同佢已經係冇聯絡，唔想再提佢。係朋友。提得多佢都會煩啦。」
可覺得吳克羣揀正呢個敏感時刻贈興？超蓮稱:「我唔會咁樣去諗人囉，但相信每個人都對得住自己嘅良心。」李蘊撐你喎!「佢一定撐我啦，佢都係喺佢角度講，我唔知道呀!」見超蓮心情好好，且明顯有備而來，又笑言傳媒只留意佢嘅戀情:「其實我工作都好努力0架!」