立法會議員以往「瘋狂」印利是封、揮春可以開公數，但印聖誕卡就唔得，呢啲係咪叫做節日歧視呢？為咗公平對待所有節日，普天同慶，立法會秘書處建議修改規則，放寬議員開公數限制。根據新規矩，但凡同節日有關嘅製作，載有議員姓名同埋聯絡資料等，一律可以開公數，咁如果整某某議員月餅得唔得呢？咁就唔得喇，因為食物、飲料、鮮花都係唔可以開公數。
除咗建議更新呢個規定，將來議員齋做選民登記，只要冇拉票或者反拉票都可以開公數。仲有，家陣議員印工作報告，只要幅相有政黨名或者黨徽都開唔到公數，而以後會睇文意，如果過半都同立法會事務有關，照樣可以開到部份公數。