有請小鳳姐！今次《蘋果動新聞》請到巨星徐小鳳玩「人人問小鳳姐」，小鳳姐在樂壇的輩份高人一等，德高望重的她，原來好生鬼又風趣，講到唱歌問題時，有足夠本錢驕傲的小鳳姐，不但即場晒冷清唱，更反擊有市民指她將《順流逆流》歌詞「成就」唱錯音「盛州」，強調自己絕對唱啱音，更不認同唱歌時有嘟嘴，因自己不是嘟嘟，全場爆笑喜氣洋洋！
採訪：余燕儀
夏先生：小鳳姐有幾多件波點衫？通常會唔會拎去乾洗？波點衫仲喺唔喺度？
小鳳姐：佢個樣咁似蘇永康嘅！部份波點衫我係保留，如果冇壞到，我會用特別方法去清洗，有啲洗完就冇用，有啲可以洗。
李先生：我後生時好鍾意聽你啲歌，可唔可以即場獻唱幾句名曲？
小鳳姐（扮一臉嚴肅）：你幾多歲呀請問？你後生嗰陣，幾時呀？（說完忍不住大笑，清唱）熱烈地彈琴熱烈地唱，歌聲多奔放，個個喜氣洋洋。
吳先生：小鳳姐你鍾意陸小鳳定王小鳳?
小鳳姐：總之小鳳我都鍾意啦。
吳先生：你喺電影《最愛女人購物狂》入面扮富婆，現實係咪都係咁買嘢㗎？
小鳳姐：唔係㗎其實，睇吓買乜嘢啦，我唔係咁誇張去買，但其實我個心想㗎。
盧小姐：我想問你鍾唔鍾意着小鳳仙裝呢？同埋鍾唔鍾意食鳳仙雪條？
小鳳姐：幾好喎，鳳仙雪條係黃色嗰隻嘛，我食過，幾好食，其實最近我食嗰隻好似係士多啤梨，唔係，係黑加侖子，嗰啲味好好食，紫色嘅，但成日都買唔到。
陳小姐：你人生食過最大一鋪牌係幾番？收咗幾多錢？
小鳳姐：嘩！真係唔記得，好似都有50幾番，係好少錢好少錢嘅，但嗰次之後我係冇食過糊。
盧小姐：Hi，小鳳姐，平時有冇打吓牌？你打幾錢一底呀？
小鳳姐：我𠵱家冇玩呢個遊戲好多年，超過咗30幾年，已經忘記呢個遊戲咁滯，其實以前我係睇朋友，朋友話點玩我就點玩，其實係儍嘅，唔應該咁。
