美國知名網絡食評人Hans Lienesch又公佈咗今年佢心目中頭十位即食麵排行榜啦！第一位由上年第五位的新加坡百勝廚叻沙拉麵奪得，而上年第一位的馬來西亞MyKuali檳城紅冬蔭功麵就跌咗落第四位啦！除咗好唔好味，Sadwell HK註冊心理學家陳志豪就指原來食即食麵都反應到你的性格的，你又屬於以下邊種？
1. 食麵當正餐型：
對飲食健康無甚要求，求其好味容易煮又飽肚就得的人，多數性格都是今朝有酒今朝醉、及時行樂的，搵工只求錢不求滿足感，責任感亦較低，找卡數只還min pay工作上老闆叫做Ａ唔會多做B的一種。
2. 過冷河加料型：
比起連湯連麵直煮唔加料的人來講，分開湯麵烹調甚至將即食麵變成美食的人明顯對生活講究很多，對自己的飲食亦有要求，是注意健康的人，心思較細密，較有自信和耐性，做什麼都力求完美的。
3. 急急食型
精神有點焦慮，正處於壓力當中，但工作有雄心，目標明確，能夠一心多用同時進行多件事，是上司喜歡的搏殺型。
4. 慢慢嘆型
同過冷河加料型相似，心理壓力較低，懂得享受生活，喜歡所有事要盡在掌握之中，但為人較固執、死板和很自我。
5. 天馬行空型
前排興過牛肉飯或杯麵加雪糕呢啲天馬行風的食法，喜歡試呢類新食麵法的人，勇於嘗試不同「美食」，性格顯然較大膽，思想較開放和新穎，不過奇怪飲食法未必人人啱，朋友响佢同枱食飯可能頂佢唔順。
陳志豪補充說，食即食麵都關乎文代背景問題，例如日本人食麵要飲埋湯才表示麵夠好食或飲湯要發聲等，而韓國人就視即食麵民族美食、視食即食麵為享受等，都跟香港有所不同，性格分析就不適用於分析這些文化特色了。
記者：容慧心