「九七都來了，仲搞咁多嘢？」
「就係趕在九七前，有咁大玩咁大，到上面落來，屎都無得食！」
「樹大招風」鍍金對白，電影講三大賊王的……不是威水史而係着草記。做賊都政治化呀校長，咪再鬧年輕人。然而有咁大玩咁大，只是主觀宏願，來到九七大限，換過支旗，拜拜肥彭，回歸親娘，搞極唔大，數埋過去三年，玩極唔起，山雨欲來，歪風滿樓，一切像歌詞，隨風還好，家下是：有風，谷氣，但唔准講！
賊王九七後無啖好食，當今最襟撈的，是長做長有，叮極不移的鄉紳系。做賊要搵地方落腳，做鄉紳呢，最仆街那個都有幾幢丁屋和N躉泥頭山！
過去三年，上面落來的，是version 2.0省港旗兵，搶爆的不是金舖而是藥油奶粉。賊王睇到，想唔攬住輪椅喪喊都幾難。香港人何嘗不是含淚睇新聞？差佬查身份證？冇玩啦，警棍兜頭扑！警槍向天開！三大賊王來不及世紀聯手大龍鳳，AK47被廢武功，山東街擲吓磚都定性做暴亂！電影最入肉的啟示是：賊王唔知碇喺西環上岸，出事！口罩廢青，天台屋無間，如何發難？