八方最近同政界中人講起9月立會選舉，大家都話頭痕，皆因今屆有大批新政團喺五區直選落場，連同舊有嗰批，爭崩頭下，賽果難料。
就連功能組別都不知幾多暗湧。八方聽聞，音樂創作人、為謝安琪製作過唔少好歌嘅周博賢蠢蠢欲動，有意循體育、演藝、文化及出版界參選，同相信會爭取連任嘅馬逢國硬撼。嗱，呢個界別係團體同個人票夾雜，唔係一人一票咁簡單，過往都有民主派人士上陣敗選。雖然周博賢一直關注社會議題，不時為演藝文化界發聲，但喺建制鐵票下，未必佔上風。
八方問過周博賢係咪參選，佢證實考慮中，但仲未扑槌。有傳佢會加入「香港列陣」，佢話係傾緊及研究階段。相信唔少業界想周博賢上陣，以A餐雞蛋撞石牆，對抗壓迫那一仗。