財政司司長曾俊華噚日出席「塑造品格 共創未來」計劃啟動禮，同同學仔分享知識同品格對未來發展有幾咁重要，其間以電影《暴雨驕陽》入面一句名言「把握今日」勉勵同學（查實佢2014年已經用過呢句金句）。
鬍鬚曾致辭完畢後，收到一個大驚喜，主辦單位突然喺後台推出一個生日蛋糕，乜主辦單位都想為英女皇90歲生日慶祝一番？原來財爺同英女皇係同一日生日，財爺正式踏入65歲變長者，可以兩蚊搭港鐵嘞喎！
財爺見到生日蛋糕嘅一刻，表現驚訝，唔知同特首梁振英喺被掟杯受襲後嘅震驚樣，似唔似？現場嘉賓則齊聲向財爺講聲：生日快樂！而噚日財爺辦嘅同事都有送cake為佢慶生（圖）。