洋參大王、恒發洋參（911）主席楊永仁年初話自己財困，抵押落嘅恒發股份遭斬倉處置，公司股價1月曾經暴瀉逾九成，有人覺得最可憐嘅係高位買入嘅股民，其實加拿大安大略省嘅農民都好慘，點解咁講呢？
原來安大略省近年有七成嘅洋參都係賣畀恒發，不過由舊年開始，恒發忽然間唔找數，有班農夫問銀行借落錢，都唔能夠定期還，之後先揭發原來係恒發老闆財困。
彭博訪咗一位叫做Peter嘅農夫，佢話有546箱洋參包好晒等運去中國，總值差唔多200萬美元（約1,550萬港元），不過恒發1月暴跌後，啲貨已經出唔到。
不過，Peter都唔係蠢，除咗種洋參之外，仲有種煙草同埋番薯。佢估計有三分一農夫運完洋參之後，都收唔返錢，有啲運一半唔運一半，無蝕得咁甘，有啲就好似佢咁無出貨。不過Peter就無講啲洋參可以點處置，斷估唔會自己用嚟沖參茶啩？