體壇拾趣：伊朗網手唔忿輸打裁判

周日喺土耳其舉行嘅ITF網賽，伊朗球手阿比迪尼（小圖）以0:6、0:2落後畀英國球手艾斯華嗰陣突然情緒失控，怒掟球拍之餘仲想追打裁判（圖）！據一名唔肯開名嘅英國球員事後透露，原來當時阿比迪尼因為唔服輸而爆粗，之後就失晒控咁攻擊一名開聲警告佢嘅裁判。29歲嘅阿比迪尼自2010年開始參賽，至今戰績為2勝66負，從未獲得排名；ITF周三就宣佈將阿比迪尼暫時禁賽，亦唔排除事後會追加處罰。