早前香港眾志黨徽被指抄襲，俾人話同西班牙巴塞隆拿舉行嘅Barcelona Gallery Weekend展覽活動標誌好似，但眾志否認，強調外聘嘅設計師話冇抄襲。咁設計Barcelona Gallery Weekend標誌嘅公司Hey Studio又點睇？八方問過佢哋，佢哋話雖然標誌好似，但唔一定代表抄襲，算還眾志一個公道。
Hey Studio話個標誌係兩年前設計，認為幾何設計出現一模一樣作品絕不為奇，「即使連色調都好似，令這件巧合的事更惹人注意，但我們就是住在一個充滿巧合的世界。」又強調任何設計，無意識比有意識嘅時候更多，「一件設計因某事獲得啟發、或者說它是抄襲，其實是很相似，如何判斷亦是很主觀」。佢哋仲話唔想糾纏，而一個喺巴塞隆拿嘅藝術活動標誌，若然啟發一個香港政黨嘅黨徽，實在令人難以置信，「應該更加值得慶祝的是，我們就是生長於一個甚麼也可能發生的時代和世界。」