4月21日係英女皇90歲生日。講真，事頭婆97前管咗香港咁多年，唔多唔少都令香港人留下好多美好回憶！最正係其實「英女皇」呢個角色喺好多影視作品中都有粉墨登場，當年電視播完之前就會出英女皇個樣同埋播英國國歌，觀眾都冇話反感反而係集體回憶添。97之前好多港產警匪片，都例牌有佢個大頭相客串，出鏡率同關公有得揮。
當然好多電影都曾經搵人扮過英女皇啦，其中1984年《最佳拍檔之女皇密令》就係少數港產片搵人扮事頭婆扮到出神入化嘅電影啦，最記得當年佢仲係配埋講廣東話添，幾親切呀！
玩英式幽默玩到出神入化嘅《戇豆》又點會執輸，當年佢都有條片係話見英女皇，結果一頭撼爆女皇個頭添。2013年佢再拍一套《特務戇J之救國大業》，臨尾再一次打咗英女皇一鑊，算係延續戇豆嘅幽默。
成套戲都講英女皇嘅就有06年嘅電影《英女皇》（The Queen），故事就講戴妃死後，女皇決定點處理輿論，飾演英女皇嘅海倫美雲勁好戲，當年仲拎埋奧斯卡影后添。
咪以為全部電影都係得英女皇登基之後嘅故事，2010年套《皇上無話兒》雖然係講英女皇嘅父皇佐治六世治口吃兼喺二戰後發表演說嘅故事，童年版嘅英女皇同埋皇妹瑪嘉烈公主都有出現o架。
卡通片原來都有唔少英女皇嘅蹤影，例如《阿森一族》就曾經多次有英女皇登場，《迷你兵團》甚至係講搶英女皇個皇冠添。
2012年英女皇都親自演出咗一場全球超過10億人收睇嘅好戲，就係倫敦奧運揭幕禮，佢同占士邦丹尼爾由白金漢宮出發到坐直升機兼跳傘登場一幕，呢場戲後面接住影真嘅英女皇同菲臘親王行上看台，真係勁到爆炸啦！