【文化籽：字裏凡間】
法律面前人人平等，但不少法律陷阱，其實潛伏在生活以至職場中。有位靚女律師最近出書，用72個生活常見事例，解構當中蘊藏的法律概念。適逢4月轉工期，集中講講職場法律，如遞信辭職有可能是「被辭職」、返工放飯出街lunch時受傷能否claim工傷，職場上的迷途羔羊知多點，以免誤墮法網。
這位女律師叫梁寶儀（Nancy），主要做訴訟和調解，筆名蘭詩，現於報章寫專欄講解法律知識。因為貌美，有人會叫她「法律女神」或「蘭詩女神」。蘭詩由起初接觸一支筆，以至出書講生活法律，皆因受朋友兒子的遭遇影響：朋友兒子到櫃員機排隊等撳錢，誰知上手忘記取錢，他亦沒有留意，「鬼掩眼」將別人的提款跟自己的提款一同拿走，結果兩個月後東窗事發，有警察上門。尚餘一年就大學畢業的他，未出社會就有刑事案底，還因此患上抑鬱，「好可惜喺香港法律上係假設所有人都識法律，『唔知咁係犯法』唔係抗辯理由。」
借鑑朋友的傷心事，加上蘭詩應邀到一些公司開講座時，發現無論是大公司高層或專業人士，對一些基本法律概念聽都未聽過，令自小志願做教師、看衛斯理和張小嫻小說長大的蘭詩叮一聲，覺得要用自己的法律知識，透過文字拯救迷途羔羊，免墮法網，「去年解款車路不拾遺事件，至少令大家開始知道隨街執錢會被檢控，可以是刑事罪行。」
日常職場實例 助市民自保
出書講法律，內容複雜隨時趕客，蘭詩這本《法律陷阱——72個超實用生活法律知識》，就以許多常見又常被大眾忽視的生活事例作解釋，職場、錢銀交易、感情、生死大事等等：「大部份內容都會喺職場或生活上經常接觸到，好似第一章打工篇，離職、攞病假到claim工傷，其實職場上有好多法律概念涉及僱傭關係，知道多一啲，對自己權利都保障多啲。」但蘭詩強調不可一本通書睇到老，此書只提供一些正確基本法律知識和概念，讓讀者懂得保障自己，卻非專業法律意見，每個情況都不同，「唔係話知多啲可以認叻，但有一句名句叫knowledge is power，知道呢啲知識，起碼保障咗自己應有嘅權利，等人哋蝦唔到你。」
放飯時間受傷可否申請工傷？
蘭詩除了寫專欄，有次主持電台節目，解答觀眾法律疑難時，有聽眾打來問：「有次開工食飯，喺飯堂唔小心拗柴再PK，但公司話我當時食緊飯，唔係做緊嘢，冇得claim工傷賠償喎。」蘭詩解釋，在《僱員補償條例》上要根據是否於「工作期間」受傷。曾有英國案例裁定，員工前往公司飯堂時，都算受僱工作期間；有案例試過由受僱餐廳過馬路到僱主另一分店餐廳午飯時被車撞傷，法庭裁定當時屬工作期間可獲工傷補償；不過亦試過有案例，員工外出午飯遇交通意外死亡，但法庭裁定意外在公路發生，不算工作期間，所以蘭詩說法庭會視乎每個案例情況而定，難以一概而論。
自己劈炮？被老闆炒魷？
不少打工仔受夠「腦細」氣，劈炮走人，蘭詩說她的朋友曾有此經歷：「頂唔順『腦細』日日呼喝，甚至仲講咗句：『你留喺度唔死都無用！』搞到咁僵，想唔遞信都唔得，仲用埋自己積蓄當代通知金，無非只想盡快離開鬼地方。」蘭詩指此情況有機會構成「被辭職」，法律上解作「法律構定終止」（Constructive Dismissal），意指如果僱主行為嚴重違反僱傭合約精神，或顯示出不打算受僱傭合約束縛，在此情況僱員有機會視為被僱主炒魷，「好似早前有法庭個案，有菲傭因為被僱主辱罵，甚至用手打面，驚得滯辭職走。經審訊後法官裁定個案為被辭職，僱主要畀返晒當係炒菲傭魷魚嘅賠償。」
僱員3大疑惑
•年尾臨時唔出雙糧，實係無良僱主？
要看合約有否寫明雙糧是「合約規定」（contractual）還是「酌情發放」（discretionary）。
•僱主可以用款項代替法定假日？
不能。要員工假日工作，需於法定假日前後60天安排另定假日，否則可被罰款。
•病到七彩要你返工得唔得？
員工病假前已受僱不少於一個月、有醫生紙等情況下，可放病假。
記者：余瑋
攝影：徐振國
編輯：李寶筠
美術：黃創泰