林峯紅館騷月底開鑼，由新年已開始狂操減磅的他，前晚在新蒲崗為個唱綵排時，面頰由以往的「圓峯」變成「尖峯」，除工作人員讚他比以前健碩，就連現場記者都驚嘆就快認不出他。
林峯接受訪問時表示上星期做完gym上磅時，磅到自己只有139磅，比起未減肥前的160磅，足足輕了21磅。他說：「𠵱家嘅狀態，應該係自己10幾年嚟最瘦，原本做好嘅演唱會衫要換，連褲都要換，預咗演唱會會着少啲。」問他屆時會否表演「國王的新衣」或學杜德偉脫剩內褲，林峯笑笑口說：「我冇練下身喎！咁褲點都要着嘅！」
「踎低起身見暈」
問到女友千語BB有否讚他「手感」比前好，林峯四両撥千斤說：「你哋要問番佢喎，呢排自己都要閉關，喺放狗時大家會見吓面，咁其實佢都有鼓勵吓嘅，反而係父母見到我會『嘩』出嚟，因為咁多年都未見過我咁嘅狀態，佢哋最驚我上台唱歌冇氣力，不過其實我氣力大過之前，舉重都重過以前。」
除了操弗減磅，林峯同時要忍口戒食，主餐只可以食雞肉和蛋：「減肥最初要戒糖，搞到血糖太低，真係踎低起身見頭暈，𠵱家可以食番薯，拎住個番薯就好似拎住嚿金咁，演唱會慶功已經揀定地方，會同班工作人員食火鍋，當係自己嘅目標。」
問林峯會不會減肥減上癮，他就派定心丸說：「放心，我咁鍾意食嘢，唔會上癮嘅，不過演唱會之後都想keep一段時間，因為唔係咁易操練到咁，唔捨得肥番。」
採訪：王連連
攝影：葉君海
