熊黛林（Lynn）早排承認接受咗男友、即郭可盈細佬郭可頌嘅求婚，佢哋仲啱啱喺月中以2,000萬買入北角半山單位，估計都用嚟婚後築愛巢之用，但婚期仲未對外宣佈。「準郭太」Lynn噚日喺瓦努阿圖拍完內地真人騷《我們的法則》，同有份一齊玩呢個騷嘅李亞鵬、吳奇隆等人飛返香港，之後仲趕去天際100開記招。
十指緊扣
Lynn噚日一身便服戴住黑超揹背囊，佢經理人夾埋未婚夫郭可頌玩驚喜嚟接佢機，Lynn見到未婚夫即笑晒，兩個人見到有記者影相，就隔開十幾個身位分開行，Lynn先跟上旅遊巴，而郭可頌就窩心地幫未婚妻搬行李。上到旅游巴，郭可頌同Lynn極速合體，即排排坐手拖手，Lynn一臉病樣都小鳥伊人上身挨實。其間，Lynn更將未來老公介紹畀同車隊友黃子韜及工作人員認識：「這是我弟弟。」
Lynn喺記招上，問到喺節目要捉雞同素顏示人，佢笑話：「因為太餓，我曾經餓到暈倒，所以我睇到嘅唔係雞，係『土豆炆雞』喺度跑，最初會顧慮冇化妝，後來習慣咗，慳番化妝時間。」
撰文：馮仁昭
