周日女皇盃賽日一如以往用全闊A欄，天文台預測或有會雷暴，提防在變化地上作賽。睇番上季同日田A欄十場賽事，當中九場有一至三檔馬上名，並合力交出六W，似乎養草後對內欄馬有利，再加上預測有雨，上次淋地就見到「好友心」及「至尊飛星」貼欄放到，故此具前速之內檔馬值得優先留意。今次列陣馬中，第三場「銀城福星」兩次角逐田A欄均上名，抽得三檔可賺跑道形勢，隨時會回復表現。另外，第四場「萬事欣」三次跑田A欄未失前四名，排檔又好，加上變化地有過表現，有力延續佳績。