周三NBA季後賽東岸首圈，騎士喺JR史密夫（J.R.Smith）帶領下，全隊轟入20個三分波，最終主場107:90擊敗活塞，場數領先到2:0。
巴克利恥笑：代言生髮水
今場轟入20球三分嘅騎士，追平由1995/96球季超音速、2010/11球季小馬同2014/15球季勇士保持嘅季後賽單場三分球紀錄，連三分11射7中攞到21分嘅JR史密夫都話難以置信：「吓！我哋今場喺三分線外起手38次？」佢又話射入咁多球全靠隊友幫手：「隊友一見到我有空位就傳波畀我，我亦會即刻起手，就係咁簡單。」
射入全場最高27分、包括兩球三分嘅勒邦占士（LeBron James）亦大讚隊友：「騎士陣中有好多射手，佢哋好似狙擊手咁準；我就覺得自己似架坦克車多啲，喺場上不斷鏟籃，強攻對方內線。」不過，占士表現幾出色都好，haters始終會搵到位笑佢。好似出名口臭嘅巴克利（Charles Barkley），最近就恥笑占士髮線不斷後移，就快變禿頭；佢仲話當NBA波衫喺2017/18球季可以落廣告，騎士應該幫生髮產品代言，等占士可以名正言順咁用生髮水喎。