上星期六跑馬之後揸車返屋企，聽收音機節目，電台主持人話訪問南華體育會足球部主任委員（俗稱南華足主）張廣勇。當日賽事第五場跑第三班千二米，有一隻三歲馬叫做「勇晉神駒」，馬主就係張廣勇，呢隻馬有排都未贏得，唔講住，咁啱不久之前，遇到張廣勇，佢猛叫左丁山做師兄：「我係1981年新亞企管系，正宗中大新亞師弟嚟㗎。」呢位師弟好鬼客氣，翻查紀錄，佢嗰屆有阿寬、潘源良等人。
喺香港，做馬主好難賺錢或有回報，買到匹「戰利品」，「精英大師」純屬夠運，但有時贏馬，都有啲獎金收嘅，做足主咯喎，就肯定有蝕冇賺。左丁山係細路哥之時，爸爸係光華體育會義務秘書，試過一年有份參加甲組足球隊嘅工作，但純屬跟頭跟尾跟埋去食飯箒，爸爸話足主先至係「營養主任」，每有球賽就掏腰包找數，威一兩年就唔再玩㗎嘞。香港足球史，社會史上最威風嘅足主，差唔多永遠係南華會嘅，上世紀五六十年代之交，霍英東想做南華足主，都被南華會重臣拒諸門外（據傳中間亦有港英示意），於是霍老闆一氣之下出錢搞愉園、東昇，與南華搞足球對抗。
時移世易，香港足球沒落，搵人做南華足主都幾難，以前搵羅傑承承包大搞，有過起色，後來羅傑承退出，南華足球一度低沉，2014年南華會與張廣勇達成協議，成為南華足主，獨力為南華足球隊經費包底，果真是心口寫個勇字，很傳統的「營養主任」，其志可嘉。但做營養主任要有一個厚荷包，錢從何來？後來從新亞生活月刊（2012年9月號）找到一篇張校友的訪問，原來他在1985年創業，成立AET公司，從事石油開採器材貿易，首先開拓中國市場，為中國石油業引進歐美先進石油開採設備機械，今天已是中國數一數二的進口鑽探設備的公司，張校友亦因此在歐洲、南美洲建立廣泛人脈關係，故此曾獨力邀請巴拉圭、厄瓜多爾國家隊來港比賽。商而優則足球，張校友具備必需條件，適逢中國發佈長期足球發展規劃文件，開拓體育產業，張校友大可乘時大力提高香港足球水平，進軍中超，衝出亞洲，打出名堂。但是本港足球市場細，收入奇低，以南華足球隊規模，每年蝕本二千萬元不足為奇。看不到回報希望，實在令人氣餒，張校友要令南華及香港足球回復姚卓然何祥友年代的光輝，稱雄亞洲，除了石油生意之外，還要發揮新亞精神，多唱「路遙遙，無止境……！」