近年本土論興起，梁特首政權視之為大患，身為專業「梁粉」嘅恒隆地產（101）董事長陳啟宗噚日主持論壇，一聽到民主黨副主席羅健熙不停批評梁特時，就反駁對方先係撕裂社會嘅罪人。
陳啟宗就話「民主、選舉的定義就是撕裂社會」，因選舉只有你死我亡，又叫對方不可以咩事都怪梁特首，當年董建華都被「媽叉到飛起」，但事實證明佢無錯喎，仲話本土派「唔撕裂梁特就無存在價值」。
華華雖然唔明民主點樣撕裂社會，但睇得出陳啟宗護駕心切。事關巴拿馬文件揭發多個大孖沙擁有英籍，陳啟宗同民主大國美國有咁深淵源，咁都狠批本土唔愛國愛港，難得。
會後想追問佢對於其他大孖沙國籍嘅意見，及噚日喺北京返港有無自己拎行李時，佢就走夾唔唞，仲喺會展連走三道後門避開華華。