港鐵4月起推出「開心搭．生日獎」活動，每月抽出一個日子，嗰日生日嘅香港市民可以領取車票，享一日免費任搭兼有現金券等生日禮物。
港鐵主席馬時亨噚日喺香港站拍住汪明荃抽獎（圖），抽出5月17日為生日之星，點知期間汪阿姐嫌呢啲優惠，小恩小惠，佢同肥馬講：「𠵱家搭車咁貴，呢個優惠有幾多人受惠？受惠嘅人得好少喎，票價減少少仲好啦！」嘩，身兼政協委員嘅阿姐開口，肥馬不敢怠慢即刻回敬讚阿姐提供好多意見，阿姐搞笑回應：「我嚟梗係要畀意見啦，唔係費事嘥時間嚟……係咪好後悔請我嚟呢？」
阿姐同八方講，香港車費貴、港鐵亦貴：「搞呢啲活動開支貴，又唔係咁多人受惠，減價好啲，或者出糧後嗰日全港免費搭車，一日都好呀。」有記者問，係咪應該邀請佢加入港鐵智囊？阿姐話︰「係呀，我係急市民之急，政府有份㗎嘛！」