近日天氣回暖，但好多行業仍猶如身處寒冬，例如傳媒。《太陽報》、亞視及星島新聞集團（1105），停業嘅停業，減薪嘅減薪，睇到華華都幾欷歔。
星島早前已發內部通告，通知高層今年最多減薪兩成。集團噚日出咗2015年年報，原來緊縮措施舊年已經開始緊。好似主席何柱國，薪金連花紅整體人工就由2014年的逾1,000萬元，微減2.5%至去年976萬元；而行政總裁蕭世和，舊年人工就有892萬元，亦較前年減少3%。
今年星島減薪，包括上述兩位執行董事在內，如用最高減幅20%計，即何生和蕭生今年會分別少收195萬及178萬元。去年星島盈利大跌45%，僅賺6,228萬元，兩位最高薪人士如減20%人工，已幫到公司慳逾370萬，認真幫輕唔少。