早前內地發表《中國足球中長期發展規劃（2016-2050年）》，目標「實現足球一流強國」。眾所周知，中國現任皇帝有一個足球夢，《規劃》所謂「實現足球崛起夢、體育強國夢、民族復興夢」，無非係百官獻媚。
睇睇《規劃》洋洋七千字，偏重硬件：未來五年將建成二萬所足球特色學校，全國足球場地數量超過七萬塊……總之係一堆數字目標，同「十三五」規劃差唔多。發展足球設施係必須卻非充份條件；小生敢斷言，2050年中國男子足球隊仍然係弱旅。
皆因中國隊際運動九流。中國有邊項男子隊際運動堪稱世界強國？唔好同我講「體操、跳水、乒乓球」，因為呢啲所謂隊際，只係靠操練出一班機械人，喺個人賽事稱霸，幾乎毋須團隊合作。但足球唔同，十一人落場，係最多隊員的主流運動，teamwork極重要，所以李斯特城可憑將士用命，力壓粒粒皆星嘅英超Big4。
英國人做到嘅，中國人做唔做到？柏陽話「不能團結、窩裏鬥，是中國人的劣根性」，又話「一個中國人是條龍，但三個一起就成了一隻豬、一條蟲；一個日本人看起來像條豬，但三個就成了一條龍」。就算中國將來爆出一個美斯、一個C朗，佢哋只會埋怨另外九個豬一樣的隊友，唔交波、無合作，莫講話要成為一流強國，睇怕要繼續被teamwork極強的小日本、南韓仔騎住。
有朝一日市場炒「足球概念股」，千祈咪上當！
笑笑生
mailto:[email protected]
本欄逢周五刊出