【本報訊】黃毓民昨費盡唇舌盤問梁振英就受襲一案的報警過程，梁指當時拾起玻璃碎片後，將碎片交予保鑣並要求對方報警，強調自己沒與保鑣商討案情、更沒向對方下達任何指示。黃聞言詫異地說：「就咁畀玻璃佢（保鑣），冇講過任何嘢？」認為梁此舉並不合理，兩度暗諷梁與保鑣「即你哋兩個心領神會啦？」
黃斥接碎片自動報警不合理
梁盤問下承認就報警方式、時間等具體細節等毫不知情，當時只將證物碎片交予保鑣，黃聞言指「除咗畀玻璃，冇任何指示？」梁回應「大家都清楚見到係襲擊行為」，認為毋須作特別指示。黃追問「即係一句說話都冇講過，然後就報警喇？」梁承認。黃於是再問「即你哋兩個心領神會啦？」裁判官聞言打斷「呢個都唔係問題嚟嘅」，指示證人不用回答。黃續說：「就咁將塊三尖八角嘅玻璃袋喺身（交予保鑣），就叫佢報警？」他堅稱過程不合理，但裁判官不耐煩打斷「合唔合理應該由法庭判斷」。
黃遂指實情為梁與保鑣兩人曾互相討論案件，當獲告知會議廳內的行為或構成普通襲擊，梁才決定報警。梁否認，強調「作為常人我清楚知道有人用玻璃杯掟我」。
■記者楊思雅