零售市道唔好，但生意都要照做嘅。好似珠寶行周大福（1929）咁，啱啱先公佈完上季銷售大跌26%，但公司仍無懼零售寒冬，繼續搞貴價珠寶拍賣會，今個星期六（23日）仲請埋一眾VIP去灣仔君悅酒店食飯兼睇靚珠寶preview，落力谷銷情咁話。
今次周大福共推15件靚珠寶，料年底正式拍賣，暫時未有估價。其實周大福每隔1、2年就會搞高端珠寶拍賣會，今年已經係第五屆。以往公司例牌會揀一個城市來做珠寶設計的主題，今年周大福執行董事鄭志剛（Adrian）就話要搞新意思，改用抽象藝術做藍本。例如系列中名為「幻藝方萃」的鑽石及紅藍寶石頸鏈，據講設計靈感係來自荷蘭畫家蒙德里安（Piet Mondrian）嘅作品……望落係有啲抽象。另一條「心弦盈韻」就係inspired by抽象大師康丁斯基（Wassily Kandinsky），同佢嘅名作《構成第八號》有無異曲同工之處？真係要啲想像力先領悟到！