市值超英趕美、恒大（3333）同阿里巴巴夾份投資嘅足球隊「廣州恒大淘寶俱樂部」（下稱恒大淘寶），新三板上市後首次公佈全年業績，2015年勁蝕近10億元（人民幣．下同）。公司解釋，蝕錢係因為贏得太多比賽喇，令派畀球員嘅獎金開支增加！呢啲咪係霸氣囉。下次蝕錢嘅原因，會唔會係衰靚仔呢？
恒大淘寶上市後，市值達198億元（約238億港元），超越德國勁旅拜仁慕尼黑，成為世界第四高市值足球隊。隊波舊年業績就麻麻哋，比2014年足足蝕多一倍，全年蝕9.5億元，而收入只係增長11%，至3.8億元。
公司將虧損原因，歸咎於球員薪金、獎金開支大增；不過，恒大淘寶舊年勁買球星，先後引入喺西甲、甚至喺英超搵食嘅積臣馬天尼斯、保連奴等（見表），三個轉會費最高嘅球星，身價合計已超過5億港元啦，蝕得咁甘，其實有迹可尋。