李城喺季尾最後直路全力爭冠，可惜佢哋已經少咗一位球迷嘅支持。史基芬頓（Tony Skeffinton、圖）身在澳洲，但由細到大都係李城粉絲，上年二月被確診患癌，當時醫生話佢只得四星期命，但奇蹟出現，史基芬頓見證到李城成功護級，但今次就等唔到英超煞科，喺日前不敵癌魔與世長辭。佢太太當娜話史基芬頓近日病情唔多理想，已經唔能夠行路，但上一場睇李城賽和韋斯咸嘅比賽，見到華迪入波竟然成個彈起，嚇咗家人一跳。