徐小鳳將於7月28日至8月2日喺紅館開個唱，噚日舉行記招，現場貼滿小鳳姐入行以嚟嘅經典造型。楊千嬅、容祖兒、鄭秀文（Sammi）等一班後輩更拍短片向小鳳姐發問，至於鄭伊健、陳小春等五個「古惑佬」喺片中唱小鳳姐名曲《叉燒包》時，仲將「上海包」歌詞改做「想開包」，搞到小鳳姐笑唔停。
想着迷你裙
要數問得最到肉，首推Sammi，佢問小鳳姐：「你最近有冇拍拖？好耐冇發巿喎，你要趁青春感覺戀愛。」小鳳姐反爆之前喺街遇到Sammi同許志安，兩個人飲到微醉，仲話：「我問佢上次台上送畀佢嘅戒指，有冇送畀安仔，安仔答有。其實我從未斷過拍拖，拖友係我啲歌迷。」提到大會主題「既然青春留不住，不如有請小鳳姐」，小鳳姐話：「青春境界唔係睇表面，係睇心境，咁多年我都係認真亂咁唱。」
訪問時小鳳姐話有意聯絡當年演唱會，匿喺佢魚尾裙入面嘅小朋友。問佢今次個唱有冇勁歌熱舞環節，佢話：「會考慮，同埋着迷你裙都可考慮。」至於會唔會加插棟篤笑環節，小鳳姐好謙咁話：「我講嘢好笑咩？平時我用嚟自娛引自己笑。」
撰文：馮仁昭
