現年45歲的港姐冠軍李嘉欣(Michele)，選美後加入娛樂圈，08年嫁給富商許晉亨，2011年誕下兒子許建彤（Jayden Max），近乎完美的人生，就像是大台連續劇，在香港七百多萬人多年追看下，見證了每個幸福時光，婚姻圓滿，眨眼間跟老公跨過第七年頭，嘉欣表示兩人進入了一個新的里程碑，自爆老公是窩心暖男，更不時製造驚喜，二人繼續甜蜜相愛，又何懼七年之癢？
統籌：林妙萍
撰文、造型：顏英儀
攝影：郭賢興
化妝：Omix B
髮型：Nichol Yip of HAiR
今年是大美人李嘉欣跟老公結婚跨過第七個年頭，憑着愛和智慧擊退七年之癢，「某程度上我都認同中國人講嘅七年之癢，但我覺得反而係婚姻嘅新里程碑，婚後我同老公都花咗唔少時間互相磨合，只要明白同尊重對方嘅生活習慣，畀足夠空間大家，唔好觸及對方嘅底線，抱住珍惜對方嘅心情，問題自然迎刃而解，一段長遠關係，係要雙方一齊經營，我會將對方嘅優點無限放大，用智慧去化解矛盾，有默契地去經營一個充滿愛嘅家。」
上天賜的禮物
兒子Jayden出生後，嘉欣無私奉獻，為了湊仔私人時間亦大大減少，然而兒子就帶給她無比快樂幸福，「Jayden對我嚟講係來自上天嘅禮物，就算遇上心煩或者唔如意嘅事情，只要睇到佢嘅笑容，所有煩惱都會全部忘記，囝囝帶畀我嘅快樂，同我為佢付出嘅一定係得到更多，而我亦認識了解自己多咗，因為從佢身上睇到自己要改善嘅缺點。」
嘉欣續說：「至於同朋友就多咗共同話題，就係分享媽媽經！其實我好感恩自己擁有嘅一切，只要一家開心、健康就足夠，我唔會去將事情諗太多或太複雜，只會努力把握同珍惜當下呢一刻。」
氣質練成美貌
想當年，嘉欣18歲參加選美，贏得88年選美冠軍，轉眼間已45歲，但嘉欣的容貌依舊美麗，由「大美人」進化到「美魔女」，經常做美人有壓力嗎？「對我來講都係一個稱呼，唔會太放上心，唔會為咗要顧形象，時刻要最佳狀態先出街，其實美麗唔單止外表，而係由內而外散發嘅氣質，40歲之前嘅女人容貌係父母上天賜嘅，之後就係靠內在嘅修養，氣質絕對是可以隨時日累積，講到底，唔理邊個年紀，只要有自信、開心及正面積極嘅人生態度，人就會變靚。」
滑雪一仆一碌
近年嘉欣不時將家庭生活照放到社交網與粉絲分享，最常見是她一家三口出埠滑雪，嘉欣大讚Jayden有天份，「囝囝平衡力好好，而我就最差，兩年前我仲係滑雪初哥，喺兒童滑雪場度跌到一仆一碌，仲要好似喪屍咁爬得番起身，阿仔同老公就不停上斜坡喺我身邊滑過，諗番起都覺得好搞笑，自己就好狼狽，而佢哋兩父子就好威武。」
除了三人世界之外，嘉欣亦不時跟丈夫製造二人世界，「都會爭取時間過二人世界，我哋都會一齊睇戲、食飯同旅行，有時老公都會製造驚喜，例如去旅行時會準備小禮物畀我，都會覺得好窩心，我就比較粗技大葉，冇佢咁心思細密。」
力保兒子私隱
李嘉欣18歲開始加入娛樂圈，自此生活連帶家人也活在鏡頭之下，生了Jayden後，囝囝更成為狗仔隊的追訪目標，「Jayden仲細，我希望盡最大努力保留私人空間畀佢成長，都會推晒所有母子檔活動邀請，希望保護佢嘅私隱，將來長大都要有長輩批准先可以出席公開場合；有時出街難免會遇到記者追訪，呢個時候我同老公一定會陪伴在側保護佢，令佢有安全感，等囝囝再大啲會同佢解釋呢個係傳媒朋友嘅工作，畀時間佢慢慢適應。」
更多精采時尚內容，盡在 http://add.appledaily.com 。