停賽兩期之騎師田泰安，將於周三(20日)賽事復出，翻查這位好手今季兩次刑滿復出，均立即有馬贏，證明佢餓馬一排後，胃口同鬥志自然特別好。今期田泰安座騎中不乏惡馬，包括出戰曾勝路程之「勝風」，以及人馬合作贏過之「天心星」，料可再次贏馬彌補停賽損失。
練馬師蘇保羅與田泰安今季於谷草合作上名率高達五成，第五場三班2200米之「勝風」由田泰安接手，當然要留意。此駒今季七次出賽獲兩勝三位一殿，僅一次不入前四名，加上轉投蘇保羅馬房後，三次出爭谷草2200米均非冠即亞，今次重返強項上陣，雖然回升三班，不過負磅比上次輕20磅之多，憑輕磅之利，有力贏得今季第三Win。
至於第六場三班1000米之「天心星」，前季四戰全由田泰安包辦，並取得兩勝，直至上仗人馬才再度合作便即入位，人馬合拍可見一斑，亦證明馬匹已回復狀態，打王牌再戰必趁勇贏番場。