英國足球員人數就夠多嘞，可以叫得做係世界級球星嘅，就屈指可數，原籍威爾斯嘅皇馬進攻中場加列夫．卑路（Gareth Bale）係身價最高嘅一位。卑路喺皇馬與C朗、賓施馬合組進攻BBC，前季好厲害，上季與今季就俾巴塞隆拿嘅美斯，蘇亞雷斯與尼馬三大球星組成嘅MSN蓋過鋒頭，不斷有傳聞話卑路想返回英超踢波，曼聯與曼城都有錢有力可以支付八、九千萬鎊嘅轉會費，但威爾斯領隊高文就公開講：「卑路時常傷患困身，留在皇馬比較好，英超球賽每個禮拜都似打仗，對體能要求太高，對卑路不利。」呢番說話當然係冇錯，但高文顯然係為威爾斯着想，假如卑路經常傷出，不能代表威爾斯出征嘅話，威爾斯「國足」點可以爭取2018年俄羅斯世界盃外圍賽出綫呀！
英超係當今世界足球之中會生金蛋嘅肥鵝，球迷多，粉絲多，故此全球電視轉播費由下季（2016-2019）開始，每季超逾30億英鎊，比德甲、西甲、意甲、法甲四大聯賽加起嚟仲要多，何況在英國國內還有BT Sport、 Sky Sports另外付出51.6億鎊直播費㖭。單係香港彈丸之地，已會在2016-2019三個球季，每季付出約1億多美元，比2013-2016年季，狂增逾2倍，實在不知道LeTV電視如何賺得回來。
電視轉播費由20個英超球會按成績排名分成，今季降班的三隊下一季肯定損失慘重，大有希望拿得冠軍的李斯特城就發達咯，呢個球會由上季降班邊緣創造奇蹟，起死回生，領隊皮亞臣立下大功勞，點知帶班球員去泰國放假，受泰國班主招待，球員玩得忘形，皮亞臣個仔係球隊其中一位，𡁻完唱得罪泰國女人兼圖片曝光，泰國班主（機場免稅店KingPower老闆）於是怒炒皮亞臣，居然福至心靈，搵到過往率領大球會冇乜顯著成績嘅意大利人雲尼阿里頂上，目標係今季唔降班，留在英超分大錢啫。彭博通訊社曾報導班主搵泰國高僧為李斯特城祈福，指示吉凶。如屬實，真係靈得緊要，李斯特城成班球員冇個係球星，身價低，薪水低，首席射手華迪曾是工人兼職踢足球，踢波周薪30鎊，正一係無產階級，點估到豆腐渣價錢，打出燒鵝髀味道，令周薪26萬鎊嘅朗尼黯然失色㗎？泰國有好多英超球迷紛紛成為「自己球會」李斯特城嘅粉絲，KingPower品牌名揚天下，泰國老闆名利兼收，遠勝中國首富王健林投資西甲三大天王之一嘅馬體會。