兩支中超球隊噚晚喺亞冠盃分組賽齊齊贏波，FC廣州（廣州恒大、圖）H組作客贏南韓球隊浦項制鐵2:0後保持出線希望，而G組嘅上海SP（上海上港）喺主場贏澳職代表墨爾本勝利3:1後落實出線16強。
近三屆兩度登上亞洲王者寶座嘅恒大，今屆喺分組賽表現差，頭四場只係攞到兩分，如果贏唔到制鐵就要提早畢業。背水一戰嘅恒大喺33分鐘由列卡度高拉特接應郜林妙傳先開紀錄，換邊後兩分鐘再由郜林射成2:0完場；雖然佢哋攞到分組賽首勝，但卻有入波功臣高拉特喺下半場傷出，需用擔架抬離場。恒大攞到呢救命三分之後，以五戰得五分排H組第三位，暫時未使死住，但係因為佢哋比少踢一場嘅澳職FC悉尼同埋日聯浦和紅鑽，分別少四分同埋兩分，若然紅鑽今日作客FC悉尼攞到分，佢哋一樣玩完，宣佈衞冕失敗。
上海SP率先殺入16強
恒大隨時講拜拜，但係上海就率先入16強。上海喺主場對喺今季澳職季後賽衞冕失敗嘅勝利，靠于海同埋艾傑臣喺兩分鐘入兩球，加上孔卡入12碼，最後以3:1勝出，家陣以五戰得12分繼續排G組榜首，比排第二嘅水原藍翼同埋排第三位嘅勝利多六分，肯定攞到16強入場券。同組另一場比賽，日聯強隊大阪飛腳主場以1:2輸畀藍翼呢支南韓球隊，五戰得兩分，宣佈包尾出局。