長實地產（1113）「樓神」趙國雄除咗要諗點谷賣樓，仲要頭痕點幫置富產業信託（778）嘅商戶執位。佢噚日主持置富股東會，講明已向地產代理開刀，舉例話以前一個商場有三間代理舖，家陣生意額唔夠就三變二。
樓神解釋，好景時，居民歡迎地產代理開舖，「睇到升市都開心啲」，但淡市就要cut舖。此舉對置富影響唔大，因代理舖面積最多兩、三百呎，「租到300蚊一呎，都係收幾萬蚊，唔會影響成個商場嘅租金收入」。
樓神又會𠱁股東開心，今年置富本年報落重本，厚紙、揭頁、燙金樣樣齊，並以機械人做主題。樓神話，只得文字與數字嘅年報通常只得兩下場，唔係掉，就係墊煲底，置富整到本年報咁靚，希望股東睇完對公司印象同信心好啲。