《十年》奪香港電影金像獎最佳電影後，寰亞電影老闆兼旅發局主席林建岳多次發炮，批評《十年》唔配獲獎，日前仲將雲吞麵比喻為《十年》，反問：「如果有間雲吞麵舖是全港最好餐廳，你會唔會服氣？」嗱，八方見旅發局個網頁嘅美食推薦，其中一項就係雲吞麵，唔知岳少係咪好少瀏覽旅發局網頁呢？
而前旅發局主席、自由黨田北俊就繼續發揮抽水本色，喺fb上載食雲吞麵嘅相（圖），留言話：「全香港最好的外賣！」仲落埋hashtag「#要開會無得出去食」、「#雲吞麵我服！」等。網民留言有讚有彈，有人笑言連細蓉嘅汁都俾佢抽乾，亦有人叫佢咪齋抽水唔表態，否則最後變吹水咋。