恒生銀行（011）「一姐」李慧敏同老公袁天凡兩位金融界猛人，舊年將自住嘅山頂白加道22號屋地，以15億元天價賣出，呎價達15萬元，為全港呎價最貴豪宅。呢幅貴屋地，新業主打算拆咗佢重建，同屋宇署申請已獲批，可建成一幢4層高大宅，總樓面超過1.2萬呎。
白加道呢間屋前身係比利時領事官邸，樓齡超過70年，現時係一幢三層高住宅，但就分開3個獨立單位，總實用面積9,891方呎，間屋出面仲有一個兩萬呎花園。如今選擇重建，相信係要打造一個超豪宮殿級獨立屋。
其實呢間屋嘅新業主係邊位？至今仍然係一個謎。有人話係中渝置地（1224）主席張松橋，亦有人話係科網巨擘阿里巴巴主席馬雲。一姐賣樓勁賺13億後，就選擇搬去東半山樓王OPUS。