方皓玟、徐子珊、黃宗澤（Bosco）同金剛前晚到九展，出席有份演出電影《刑警兄弟》首映禮，子珊同方皓玟齊齊性感亮相。方皓玟在戲中有全裸演出，不過佢就笑笑口話：「所謂全裸其實上下身打晒底，打埋格仔冇乜嘢睇。」
戲中同方皓玟做情侶嘅Bosco就賣口乖話：「從未見過佢咁性感，一出場已經好勁，傷口好深（指事業線）。」方皓玟亦禮尚往來話：「我望住Bosco好緊張，流晒汗，佢眼神好有電。」Bosco話兩人有多場床戲，好彩自己冇「動L」。
子珊大反應：冇男友
至於金剛就笑子珊戴假牙同眼鏡嘅造型天下無敵，子珊即插口：「佢見到我直頭想舂我啦，其實佢女友大把貨啦，唔使望我哋呢啲。」問子珊擔唔擔心同金剛傳緋聞，子珊話：「係人都知佢唔鍾意我呢type。」金剛就暗寸子珊身材唔夠好：「係呀，雖然我手大，但性格好緊要，靚仔先有緋聞，我一向都係偶像派。」咁子珊會唔會請男友睇戲？子珊反應好大咁話：「我都冇男友，點請嚟，男性朋友就有，暫時要斷六親，驚嚇親追求者。」
撰文：馮仁昭