正當非建制嘅新興政黨、政團輪住公佈立法會選舉部署，建制派嗰邊，亦已經排晒陣準備出戰。以工聯會為例，兩個現任勞工界議員新一屆要轉戰直選，鄧家彪料落腳新東，郭偉強就備戰港島，可以預見新界東打到七國咁亂，而港島亦因為少咗一席，戰況同樣激烈。
由於工聯會現任港島區議員王國興擬轉戰「超區」，而郭偉強始終喺地區服務年資唔算好深，到底可唔可以接到王國興呢個位？認真係疑問。八方聽聞，工聯會內部有聲音，叫理事長吳秋北幫郭偉強抬轎，排喺名單第二喎。
有工聯會中人分析，吳秋北本身係福建人，港島福建幫勢力不可小覷，而佢哋同吳嘅關係好好，所以先有人建議吳秋北幫手「抬一抬」。八方打過畀吳秋北，佢冇接電話，而郭偉強就話，一切要等工聯會確認，自己都唔清楚，但就話喎：「坊間好多傳聞，講吓都冇壞。」