賭王何鴻燊四房孻仔何猷君，前日在美國波士頓趕機回港，他坐Uber到洛根國際機場，其間所坐的車在高速公路撞到前面急停的車輛，後座的猷君千鈞一髮撞落前座的掛鈎，左眼眼角受傷流血，破相險撞盲。猷君止血後繼續坐機返港，昨日清晨5時許抵港，一臉倦容的他獨自孭背囊拖篋出閘，臉上傷口明顯，並登上保母車直返大宅。
頸有少許痛
猷君昨早落機，頭戴鴨舌帽，刻意拉低遮着眼角傷口，他發現有記者守候，即使坐完長途機疲累，但仍禮貌揮手，並主動說：「咁早呀。」記者問到猷君的傷勢，可有頭暈？他說：「OK，冇嘢。」可有毀容破相？他說：「冇事，OK。」猷君指傷口沒縫針，他說：「黐咗膠紙。」他表示除臉傷，頸也有少許痛，由於下機時間尚早，他決定先返家休息。
猷君邊行邊食糖，重提炒車一刻，他說：「當時我咁啱起身拎個叉電器充電，咁啱前面停車，司機煞車，我就撞咗落個鈎度。」猷君直言當時流了很多血，而最近的醫療地方在機場，所以他就直去機場，他說：「希望唔使縫針。」發生意外後，猷君即致電媽咪報平安，四太梁安琪很擔心，胞姊何超盈則着胞弟下機要到醫院。
問到猷君會向司機追究索償嗎？他大方說：「冇，我覺得唔使咁麻煩，唔關佢事，係前面架車煞停。」猷君忽拉起帽子，左眼眼角傷口明顯，紅了一撻，他說：「幾深。」女友Kimmy當然有慰問猷君，他說：「其實所有朋友、家人知道件事發生後，亦有即時慰問，好似記者都有打嚟關心我。」Kimmy暫有工作未能來港。猷君有見抵港時間太早，為免打擾胞姊何超盈，故他選擇先回家休息。
到昨晚，記者WhatsApp問猷君傷勢如何，有否去醫院檢查時，他回覆：「現正開會，未有時間，但應該沒事啦，不是很重要啦。」
採訪、攝影：徐錦池、畢紹基、唐如
