其實，真的沒有比唔識扮識、唔知扮知更老土的事，說出來根本就是基本人格，和路不拾遺、勇於認錯一樣，小學就教啦，還不懂？不恥下問，唔肯定就一再verify，簡直是高尚情操，沒有這性格特質，根本不宜做傳媒或公關，人講乜你信乜，明啲唔明啲就扮熟晒問題，搬字過紙交功課，一兩次過到骨，上得山多終會遇老虎。
即使一時沒被拆穿，明眼人要看穿你是死頂能有何難？有時聽記者行家說起某啲冇料「企業高層」嘴藐藐反晒白眼，你便知人行正道方可得人心。
發咁多牢騷，只為分享吓公關專家教高層點樣在公開演說的場合，得體又漂亮地話自己唔識答。場合可能是記招、新產品推介、演講答問環節，總之，一旦被問到口啞啞，點呢？用邊句說話搭橋（bridging）解窘呢？專家教曰，可試：
1）「I wish I knew that」或「If only I knew that」──「我都好想知道答案」，然後順理成章講問題之複雜。
2）「If I knew that, I will be a billionaire」──「我識答，可能已經做咗首富」，專家話咁答會凸顯問題之難，恐怕不止你，是係人都無法找出答案。
3）「Who knows?」──「誰知道？」或「誰敢說？」然後接住講可能咁、又可能咁咁，畀options，不用直接答。
4）「That's just one of many things we don't know about xx」──「xx咁新/涉及嘅範圍咁廣，除咗你問嘅，仲有很多未解之謎！」跟住咪再講吓仲有其他甚麼難解答的地方囉。
有時間，再寫多啲類似bridging sentence都得，關鍵是，你要高層先承認「我唔識」。
彭瑪莉
mailto:[email protected]