仆你個X亞視定無綫嚟，亞視定大台呀…前晚大台將收費電視頻道改組，當中開咗一條頻道叫「亞視台」重播亞視以前嘅劇集，話晒無綫之前買咗亞視劇嘅版權，包括《肥貓正傳》、《美麗傳說》及《我和殭屍有個約會》等經典劇，早前鮑姐聽到都忍唔住問，點解咁似亞視嘅「歲月留聲台」，唔少網民預視無綫將會「亞視化」!?
前日一班前亞視藝人袁文傑、蔡國威、林韋辰及姜皓文等，均有現身TVB，而早已過檔大台嘅江美儀、陳展鵬及陳煒亦有同台，雖然亞視已經「壽終正寢」，不過呢班「A記」朋友感情不變，唔通亞視呢股人情味，真係去到邊散到邊?
袁文傑前晚喺facebook貼出多張合照，一班昔日亞視好戰友喺大台相聚，留言：「A記又聚會喇，此情此境，真係好難得，特別台上的那一刻，你懂的……」而網絡紅人司徒夾帶亦喺fb寫道：「站喺藝人角度，你話如果無綫請埋蔡國威、袁文傑同黑仔都唔錯。」
不過，啲網民就有另類睇法，質疑大台咁做會唔會「然後跟ATV軌跡倒閉」，話晒之前葉家寶都講過亞視死因，因為太多重溫，無限loop先出事，再加上目前有ViuTV呢個競爭對方……大台要爭出「新意」先夠人撼噃!